[东方报]歐冠：拜仁鍊車仔主W有計[09-17]

                               
登录/注册后可看大图

軍備再升呢全面撻着
歐聯重量級大戰，德甲班霸拜仁慕尼黑迎戰英超勁旅車路士。拜仁開季氣勢如虹，贏德超盃開始計起錄得5連勝，超強鋒線全面撻着；相反「藍戰士」防守麻麻，新軍啱啱磨合，戰術成熟度難同合作多年嘅拜仁相比，拜仁主場出擊贏面高，主勝可期。（Now 639周四凌晨3時直播）

拜仁今季增添路易斯迪亞斯同尼高拉斯積遜兩大猛將，進攻如虎添翼，迪亞斯連續3場聯賽入波，證明已經完美融入；由車路士借用嘅積遜上場踢完首演，今仗倒戈梗係要搏盡大踢爭氣波，鬥心有保證。加上王牌前鋒哈利卡尼負責數胡，以及米高奧利斯主導進攻，火力確實超班。

歐聯地頭專恰英超兵
至於近兩季全面重建嘅車路士，整體表現穩步提升，但關鍵時刻仍稍嫌飄忽，開季先後喺水晶宮同賓福特身上失分。高爾彭馬率領嘅攻擊線尚算對辦，但查禾查洛巴、艾達拉比奧約等中堅，同埋門將羅拔山齊士都唔係國腳級，要抵抗拜仁鋒線進襲相當勉強。

拜仁歐洲賽經驗豐富，而且主場迎戰英超球隊往績甚佳，近5次歐聯主場對英超隊豪取4勝，教練高柏尼球員同主帥生涯，都喺英格蘭度過咗十幾年，對英超足球瞭如指掌，今仗主場可望取得開門紅。