[东方报]歐冠：皇馬鬥曼城神鋒大對決[12-10]

                               
登录/注册后可看大图

麥總腳風順夏蘭特弗爆
歐聯焦點之戰，皇家馬德里主場惡鬥曼城，皇馬近期西甲連番失分，教練沙比阿朗素帥位危危乎，今仗勢必豁出去，採取主攻戰術求勝力保飯碗，射手基利安麥巴比腳風順，入波唔成問題，但防線人腳不整，恐怕招架唔住弗到爆嘅「藍月亮」神鋒艾寧夏蘭特。參考雙方近5次歐聯交鋒有4次總入球開4球或以上，最好博中位數3.5球嘅入球大。（Now 643周四凌晨4時直播）

皇馬今屆歐聯5戰4勝1負，仍保持水準，但西甲成績令人失望，上仗0比2不敵切爾達，近5場聯賽僅1勝，盛傳管理層開始討論換帥可能性，若然「銀河艦隊」今場歐聯失利，沙比阿朗素隨時會被炒。

沙比保飯碗擺大頭喪攻
由此可見，44歲少帥沙比今仗已冇退路，惟有擺大個頭搶攻，希望贏番場漂亮勝仗。「銀河艦隊」鋒線陣容強大，尤其係麥巴比狀態大勇，今季各項球會賽事上陣21場入25球及4次助攻，包括歐聯有9球進帳，排射手榜第1位，只要有佢在陣，足以撕破對手防線。

不過，皇馬防線備受傷兵問題困擾，繼阿歷山大阿諾特早前受傷，需要抖2個月後，中堅艾達米列達奧上仗亦重傷，將缺陣4個月，加上另一位中堅甸恩胡積臣、左後衞費蘭特文迪、右閘丹尼爾卡華積有傷在身，後防出現人腳荒，試問點抵擋夏蘭特。

藍月冇洛迪狂失波
曼城攻力不亞於皇馬，加上為爭入前8位，奪取直接晉級16強資格，搶分決心一定強。呢支英超豪門同對手一樣「有前冇後」，前鋒艾寧夏蘭特今季20次上陣入20球，攻力有保證，但防線弱不禁風，早前對富咸，竟然失4球，對列斯聯亦僅贏3比2，好大程度上因為洛迪卡斯簡迪養傷，令球隊失去中場防守屏障，今場失波機會甚高，有望合演入球騷。