[东方报]英聯盃：喜鵲省招牌打爆富咸[12-17]

                               
登录/注册后可看大图

至於夜啲開波嘅英聯盃8強戰，由紐卡素主場硬撼富咸。「喜鵲」紐卡素貴為上屆盟主，兼且一向靠主場搵食，加上啱啱輸咗「東北打吡戰」失威，今晚誓要搵實力麻麻嘅富咸祭旗，簡簡單單捧主勝。（無綫myTV SUPER周四凌晨4時15分直播）

副選應戰對賽輸蝕
紐卡素日前聯賽作客東北死敵新特蘭，最終畀自家前鋒禾達美迪擺烏龍搞到輸0比1，輸打吡戰冇晒「飛士」，眾將梗係急於贏番場博反彈喇，今仗就係最佳時候。眾所周知，「喜鵲」主場特醒，各項賽事近8次於聖占士公園球場出擊，豪取7勝1和未輸過，就連曼城、熱刺呢啲實力分子都係佢哋嘅手下敗將，主場例打高一皮波，而且紐卡素身負衞冕英聯盃重任，球迷必然寄予厚望，冇理由咁失威連續2場都贏唔到，因此今場無論實力及戰意都唔使懷疑。

另邊廂，富咸近期防守出現嚴重不穩，防線穿窿近4仗狂失10粒，而且佢哋客場表現奇差，各項賽事近8次作客，只得2勝2和5負，其中上圈英聯盃鬥英甲球隊韋甘比，只派大部分副選上陣，要鬥到互射12碼先驚險晉級，似乎唔多重視呢隻「盃仔」。何況之前8次正面交鋒，紐卡素取得6勝2負，擺明格食格，今場主勝手到拿來。