[东方报]意甲：卡利亞里恃地利嗒萊切[02-16]

                               
登录/注册后可看大图

今晚意甲獨腳戲，卡利亞里主場迎戰萊切。卡利亞里經過早前一波連勝後，立即彈上中游，信心爆棚，相反萊切仍然喺護級邊緣掙扎，加上客場曳爆，造訪撒丁島凶多吉少，主勝有計（Now 638周二凌晨3時45分直播）

撒丁島主場有料到
開咧後一直徘徊下游嘅卡利亞里，自從上年年尾後突然開竅，尤其係早前接連擊敗祖雲達斯、費倫天拿同維羅納，其中後兩者係護級勁敵，非常關鍵，一下子彈上中游，遠離降班區有7分距離，暫時鬆一口氣，就算上場輸畀羅馬，表現亦唔差。以卡利亞里近4場獲3勝1負嘅勢頭，加上撒丁島主場一向有啲料到，絕對唔赦萊切。

萊切雖然上仗擊敗烏甸尼斯，取得寶貴嘅3分，但只係佢哋近9場以來首場勝仗，而且烏甸出名飄忽，贏波唔算出奇。值得一提嘅，係萊切對住護級對手表現差勁，之前輸過畀拖連奴、帕爾馬、克雷莫納，迎戰維羅納亦只能打和，與卡利亞里對比強烈，加上佢哋客場例渣，近6場作客輸5場，拎得1分兼入得1粒咁大把，造訪依家咁弗嘅卡利亞里，相信都要擺低3分。