[东方报]熱身賽：拜仁未弗入波唔慌多[08-07]

                               
登录/注册后可看大图

卡尼念舊倒戈勒住踢
今晚球會熱身賽重頭戲，拜仁慕尼黑主場迎戰熱刺，兩隊繼上年8月連續兩次交鋒後，今夏再碰頭，意味拜仁射手哈利卡尼又有機會倒戈母會，呢位英格蘭國腳一向念舊，可能會手下留情。至於熱刺經過「亞洲之旅」飽受舟車勞頓之苦，加上避免再出現傷兵，今場未必會搏盡。睇番熱刺近5場熱身賽，有4次總入球開出2球或以下，今場預料都唔會多波入。（周五凌晨零時30分開賽）

雙方曾經喺上年季前熱身賽兩次交手，拜仁全部贏晒，哈利卡尼喺「馬耳他旅遊盃」上陣倒戈，球隊贏波後，佢拒絕以隊長身份上台捧盃，據悉唔想傷害同熱刺嘅感情，可見哈利卡尼非常「心軟」，今次再遇母會，「放水」都唔出奇。事實上，由於拜仁有份參加世冠盃，球隊比較遲開操，日前先至踢首場熱身賽，以2比1小勝里昂，整體狀態一般，要攻入熱刺大門亦非易事。

熱刺留力歐超盃鬥PSG
另邊廂，熱刺已經踢咗5場熱身賽，取得2勝3和，上仗打和紐卡素1比1，付出沉重代價，中場占士麥迪臣受重傷，可能需要長抖9個月。領隊法蘭克吸取教訓後，相信會要求球員避重就輕，以免令傷兵問題惡化，影響新一季部署。尤其是熱刺踢完今場熱身賽後，將於下周四凌晨出戰歐超盃對巴黎聖日耳門（PSG），更加需要留力，預料入波唔會多。